Nagdangat na sa 111 ka indibidwal ang gin-report nga napatay matapos tumama ang magnitude 7.4 nga linog sa western nga bahin sang Colombia sang Lunes.
Naglab-ot naman sa 87 ka indibidwal ang napilasan, samtang nagapadayon ang rescue operations para sa mga posible nga na-trap sa idalom sang nagkarumpag nga mga building kag estruktura sa nagkalain-lain nga syudad.
Suno sa datos sang U.S. Geological Survey, may kadalumon nga 107 kilometro ang linog kag ang epicenter sini yara malapit sa San Jose del Palmar sa probinsya sang Chocó.
Mabaskog nga nabatyagan ang pag-uyog bisan sa pila ka dalagko nga syudad sa bug-os nga pungsod.
Amo ini ang una nga dako nga krisis nga ginaatubang sang bag-o nga administrasyon ni Colombia President Abelardo De La Espriella, pila lamang ka adlaw matapos ini manumpa bilang presidente.
Bangud sini, gindeklara ni De La Espriella ang national state of emergency kag ginpahayag nga preparado ang bug-os nga gobyerno sa pagpatigayon sang rescue operations kag paghatag sang bulig sa mga apektado nga komunidad.
Suno sa presidente, panguna nga prayoridad sang iya administrasyon ang pagluwas sa mga indibidwa; nga posible nga na-trap sa idalom sang nagkarumpag nga mga estruktura.
Nangin mas sensitibo man ang sitwasyon bangod bag-o pa lamang nakaagom sang epekto ang rehiyon halin sa mabaskog nga mga linog nga nagtama sa kaingod nga Venezuela sang Hunyo.
