Nagapangayo sang dugang nga bulig halin sa gobyerno ang isa ka tricycle driver sa Koronadal City matapos magpadayon ang pagtaas sang presyo sang produktong petrolyo nga nagapabug-at sa ila kita sa pagpamasada.
Sa interview sang Bombo Radyo Koronadal kay Toto, naganubo ang ila ginansya bangud nagadugang ang gastuhon sa gatong samtang nagapabilin ang kinahanglanon nga adlaw-adlaw nga panginabuhian.
Ginpahayag niya nga dako ang epekto sini sa mga drayber nga nagasalig lamang sa kita halin sa pasada.
Bangud sini, ginpanawagan niya ang paghatag sang mas dako nga suporta para sa sektor sang transportasyon, lakip ang posible nga ayuda ukon mga programa nga makabulig sa mga drayber nga apektado sang mataas nga presyo sang krudo kag gatong.
Ginalauman man niya nga maghatag si President Ferdinand “Bongbong” Marcos Jr. sang konkreto nga mga solusyon sa palaabuton nga State of the Nation Address (SONA) agud mabuligan ang mga ordinaryo nga mamumugon kag transport workers nga nagaatubang sang pagsaka sang gastuhon.
