Ginpaathag ni Senate Impeachment Presiding Officer Francis “Chiz” Escudero nga wala sang ginatawag nga majority ukon minority sa impeachment court, bangud ang tanan nga senador nagaserbi bilang senator-judges sa impeachment trial ni Vice President Sara Duterte.
Ang pahayag ni Escudero nagsunod sa manifestation ni Senator-Judge Raffy Tulfo nga nagkuwestyon sa pagpatuman sang time limit sa mga manifestation kag pagpamangkot sang mga senador.
Suno kay Tulfo, kon duha lamang ka minuto ang gintalana para sa kada manifestation, dapat pareho ini nga ginapatuman sa tanan nga senator-judges.
Ginpahayag niya nga may mga tion nga madali nga ginapatunog ang timer sa iban, samtang may yara man sang ginapasugtan nga magpadayon sa pagpamulong tubtob lima tubtob napulo ka minuto antes patunugon ang kampanilya.
Ang isyu nagtuhaw samtang nagapamangkot si Senator-Judge Robin Padilla kay Lead House Prosecutor Gerville Luistro.
Bilang sabat, ginpaathag ni Escudero nga patas ang pagtratar sa tanan nga senator-judges kag ginapatuman ang mga layi sang impeachment court nga wala sang ginapaboran agud mapabilin ang kaangayan kag integridad sang paglilitis.
