Naglunsyar naman sang panibag-o nga serye sang airstrikes ang Estados Unidos kontra sa Iran sa ikasiyam nga asod-asod nga gab-i sang operasyon, suno sa US Central Command (Centcom).
Ginpahayag ni US President Donald Trump nga tuman ang epekto sang mga pag-atake kag ginahimo ini bilang pagpasidungog sa tatlo ka miyembro sang US military nga napatay sa nagkalain-lain nga pag-atake sa Jordan kag Iraq sa nagligad nga mga adlaw.
Suno sa Centcom, ginpuntirya sang US ang mga military sites kag communication networks sang Iran agud malikawan ang mga pag-atake sini sa mga barko nga nagaagi sa Strait of Hormuz.
Bilang sabat, gin-angkon sang Iran nga naglunsyar ini sang “surprise attack” sa Syria kag nagpuntirya man sa mga US aircraft sa Aqaba Airport sa Jordan.
Samtang, ginpahayag sang Iran nga may pila ka siyudad ang naigo sang airstrikes, samtang nagreport man ang state media nga may duha ka oil tanker ang naglupok sa Strait of Hormuz.
Ginpaandam sang Islamic Revolutionary Guard Corps (IRGC) nga indi na mangin luwas ang agianan sang mga produkto sang petrolyo kun magpadayon ang mga pag-atake sang Estados Unidos.
Sa pihak sini, ginpahayag ni US Secretary of State Marco Rubio nga bukas gihapon ang Estados Unidos sa diplomatiko nga solusyon, bisan nagapadayon ang tensyon matapos wala madayon ang nauna nga kasugtanan sa papauntat sang inaway tunga sang duha ka pungsod.
