Ginabulubanta nga 500 ka tawo ang napatay matapos maglugdang ang duha ka sakayan sa baybayon sang Myanmar, suno sa United Nations (UN).
Nadula ang komunikasyon sa una nga salakyan nga may sakay nga yara sa 250 ka pasahero, samtang ginapatihan nga nagludgang man ang ikaduha nga salakyan sa baybayon sang Ayeyarwady nga may sakay nga 280 ka tawo.
Kalabanan sa mga pasahero amo ang mga Rohingya Muslim nga refugee.
Suno sa UN High Commissioner for Refugees (UNHCR) kag International Organization for Migration (IOM), nagbiyahe ang duha ka salakyan sa guwa sang regular nga sailing season, kun sa diin mabaskog kag delikado ang dagat.
Sa masami, nagasakay ang mga Rohingya sa mga kahoy nga sakayan agud makapalagyo sa pagpamintas sa Myanmar kag sa nagaginutok nga mga refugee camp sa Bangladesh.
Ginalauman nila nga makaabot sa Malaysia, Indonesia, ukon Thailand agud makapangita sang mas luwas nga kabuhi kag mas maayo nga palaabuton.
