Nagpaandam sa subong ang pamunuan sang Korondal City Traffic Management batok sa mga pasaway nga mga tricycle drivers nga naga overcharging sa mga pasahero sa tion sang selebrasyon sang T’nalak Festival.
Sa interview sang Radyo Koronadal ginhatagan sang ligwa ni Koronadal City Traffic Management Unit head Joy Placer nga hugot gid nga ginadumilian sang syudad ang pagdugang sang sukot sa pamasahe bangud may taripa man ukon fare matrix nga basehan sang tanan nga mga naga sakay kag balor sang sukot sa kada ruta sa syudad.
Dugang pa ni Placer, masami nga matabo ang nasambit nga insidente sa tion sang tig-ululan bangud may pila ka mga driver nga naga sukot sang dugang nga pamasahe.
Magluwas pa diri, may mga insidente man sang mga driver nga naga “refuse to convey passengers” labi na kun naga isahanon lang ini nga maathag nga paglapas man sa ordinansya sang syudad.
Gina awhag man sini ang mga commuters sang maka eskperyensiyar sang overcharging kag iban pa nga paglapas sang mga tricyle drivers nga kuhaan sag laragway kag MTOP numbers kag gilayon nga e-report sa ila nga pamunuan agud nga mahatagan sang leksyon kag aksyon.
