Nagsaka na sa 51 ang numero sang mga napatay bangud sang malawig nga pagbaha nga gintuga sang pila ka adlaw nga padayon kag mabaskog nga pag-ulan sa nagkalainlain nga bahin sang Bangladesh.
Suno sa mga awtoridad, madamo nga residente ang napilitan nga magbakwit matapos malumos sa tubig ang ila mga puluy-an, ilabi na sa kapital nga Dhaka, diin nagluntad ang flash flood kag nagtuga sang dako nga halit sa komunidad.
Kadam-an sa mga napatay ang naghalin sa distrito sang Cox’s Bazar, nga ginaestaran sang isa sa pinakadako nga komunidad sang mga Rohingya refugee sa kalibutan.
Ang padayon nga pag-ulan nagpalala sang sitwasyon sa mga evacuation site kag refugee camps, nga nagresulta sa pagbaha, paghugno sang duta, kag pagdelatar sang mga serbisyo.
Ginpahayag sang gobyerno sang Bangladesh nga ginbalhin na sa mga government shelters ang libo ka mga pamilya nga naapektuhan sang kalamidad.
Padayon man ang operasyon sang mga rescue team kag ang paghatag sang pagkaon, tubig, kag iban pa nga kinahanglanon sa mga evacuees.
Samtang, nagapadayon ang pagmonitor sang mga awtoridad sa kahimtangan samtang ginapaandam ang publiko batok sa posible pa nga dugang nga pag-ulan kag pagbaha sa madason nga mga adlaw.
