Ginpabugal sang Banwa sang Banga ang ila kultura, agrikultura, kag lokal nga produkto paagi sa ila Bahay Kubo Display sa T’nalak Festival 2026.
Sa interview sang Bombo Radyo Koronadal, ginpahayag ni Richard Iskultura, in-charge sang exhibit sang Banga, nga handa na sila para sa kompetisyon kag nagahulat na lamang sang final judging.
Suno sa iya, ang ila disenyo nagarepresentar sa Pasundayag Festival sang Banga kag nagapakita sang mga panguna nga produkto sang banwa kasubong sang mais, palay, lubi, isda, tilapia, fingerlings, livestock, kag iban pa nga produkto sa agrikultura.
Ginpaathag ni Iskultura nga ila ginapakita indi lang ang mga produkto lakip man ang kabuhi sang mga mangunguma kag ang importansya sang agrikultura sa pag-uswag sang Banga.
Bangud sini, gin-awhag niya ang publiko nga bisitahon ang ila Bahay Kubo Display sa entrance area sang South Cotabato Capitol agud makita ang ila mga produkto nga presentasyon para sa T’nalak Festival 2026.
