Kinahanglan mapakita sang prosecution nga may tinuyo ukon malisya sa ginpahayag ni Vice President Sara Duterte agud mapamatud-an ang alegasyon sang grave threat, suno sa presidente sang Integrated Bar of the Philippines (IBP) South Cotabato-General Santos Chapter.
Suno kay Atty. RJ Sustiguer sa interview sang Bombo Radyo Koronadal, indi pa igo ang isa lang ka pahayag agud magresulta sa pagkakaso, bangud kinahanglan nga mapakita nga may intensyon ini nga maghatag sang pamahog.
Ang isyu may kaangtanan sa Article 4 sang impeachment complaint batok kay Duterte nga nagalakip sa ginaalegar nga grave threat batok kay Presidente Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Apang ginpahayag ni Sustiguer nga indi dapat pasagdan ang amo nga pahayag bangud naghalin ini sa isa ka mataas nga opisyal sang gobyerno kag mahimo maghatag sang dako nga epekto.
Dugang niya, kinahanglan nga hukman ang kaso base sa proseso kag ebidensya, indi lang bangud sa posisyon sang personalidad nga nalakip sa isyu.
