Posible nga indi na pagtagdon sang Supreme Court (SC) ang manifestation nga ginpasaka sang grupo ni Atty. Israelito Torreon nga nagapangayo sang Temporary Restraining Order (TRO) kag status quo ante order batok sa nagapadayon nga impeachment trial ni Vice President Sara Duterte.
Ginakuwestyon sang grupo ni Torreon ang pagpili kay Sen. Chiz Escudero bilang presiding officer sang impeachment court, bangud sa ginatawag nila nga paglapas sa nagapadayon nga mga layi kag patakaran.
Suno kay University of the Philippines law professor Atty. Michael Tiu Jr., wala naandan nga nagapanginlabot ang Supreme Court sa mga impeachment trial nga nagligad sa pungsod.
Ginpahayag man niya nga ang bag-o nga manifestation sang kampo ni Torreon kabahin lang sang ila una nga petisyon nga nagakuwestyon sa apat ka impeachment complaints batok kay VP Sara.
Dugang pa niya, bangud nagsugod na ang impeachment trial kag may mga ebidensya na nga naipresentar, posible nga tugutan na lamang sang SC nga magpadayon ang proseso kag indi na ini ibalik sa una nga kahimtangan, kabaliskadan sang ginapangayo nga status quo ante order.
