Ginkumpirma ni Senator Francis “Chiz” Escudero, nga naeleher bilang presiding officer sang Senado nga magaserbi bilang impeachment court, nga kinahanglan ang indi magnubo sa 16 ka boto sang mga senador agud mahukman nga guilty si Vice President Sara Duterte sa impeachment trial.
Sa iya mensahe matapos batonon ang posisyon sini nga Lunes, ginpahayag ni Escudero nga klaro sa Konstitusyon nga wala sang opisyal ang mahimo masentinsensyahan sa isa ka impeachment trial kun wala sang pagsugot sang two-thirds sang kabug-usan nga miyembro sang Senado.
Ginpaliwanag niya nga ini nga interpretasyon naga-uyon man sa desisyon sang Korte Suprema sa kaso nga Bayan v. Zamora sang 2000, kun sa diin gin-estoryahan ang kinahanglan nga two-thirds vote sang Senado.
Bangud sini, ginpunto niya nga dapat ini sundon agud indi maapektuhan ang mga katungod sang respondent kag sang katawhan.
Gindugang pa sang senador nga obligasyon sang tagsa ka senador nga magserbi nga hukom ang pagsunod sa nagapadayon nga balaod, bisan ano pa ang ila personal nga panan-aw.
Nauna diri, naeleher si Escudero bilang presiding officer sang impeachment court sa boto nga 12 pabor kag 8 ang wala nagpabor.
Ginpangunahan man niya ang impeachment court sang 2025 samtang siya pa ang Senate President.
Ginpaandaman man niya ang iya mga kaupod nga senador nga ipatuman ang patas kag wala sang ginaamligan suno sa Konstitusyon kag nagakaigo nga mga layi.
