Ginbuyagyag na ang identidad sang asawa ni Van Ness Wu matapos ang iya social media post sang Hunyo 29 nga naghisgot bahin sa iya romantic life.
Base sa report, gin-identify sang media outlet ang iya asawa bilang Japanese singer nga si Emi Aramaki.
Ginpahayag nga nagpakasal ang duha sa Las Vegas sang Mayo, kag ginkumpirma man ini sang record label ni Van Ness.
Sa iya social media post, ginpasalamatan ni Van Ness ang madamo nga bendisyon nga iya nabaton subong nga tuig, lakip ang pagbalik niya sa pag-tour upod sa F4 kag ang pag-abot sang iya ginatawag nga “pinakaimportante nga tawo” sa iya kabuhi.
Nahibaluan nga isa ka singer halin sa Fukuoka, Japan si Emi apang nagdako sa United Kingdom.
Nagtapos siya sang History sa University College London kag nagsugod sang iya music career sang 2021 pinaagi sa debut single nga “Lonely Night.”
Antes sini, kasado si Van Ness sa Singaporean entrepreneur nga si Arissa Cheo, nga iya ginbulagan sang 2018.
Madumduman nga bag-o lang nagpatigayon si Van Ness upod kanday Jerry Yan, Vic Chou kag Ashin sa F Forever 1st World Tour sa Philippine Arena.
Nagsikat ang F4 pinaagi sa hit Taiwanese drama nga Meteor Garden kun sa diin ginportray ni Van Ness ang karakter ni Mei Zuo.
