Nagsumiter sang hagna ang Ambassador sang China sa Pilipinas nga si Jing Quan sa Department of Foreign Affairs (DFA) agud magtukod sang isa ka common fishing area sa Bajo de Masinloc ukon Panatag Shoal bilang paagi sa pagpanubo sang tensyon sa ginadiskusyunan nga karagatan.
Suno sa Chinese envoy, mahimo ini nga sundon ang modelo nga ginpatuman sang nagligad nga dekada, sa diin nagkaangot nga nagapangisda ang mga Pilipino kag Tsinong mangingisda sa isa ka ginpatalana nga lugar.
Suno pa sa iya, kon nangin madinalag-on ini sang una, mahimo man ini liwat sa subong.
Ang Bajo de Masinloc, nga yara mga 120 nautical miles sa baybayon sang Zambales, isa ka tradisyonal nga pangisdaan sang mga manugpangisda halin sa Pilipinas, China, Taiwan kag Vietnam.
Ginduso man sang Chinese ambassador ang mas malapad nga kooperasyon sa tunga sang China kag Pilipinas, lakip ang joint oil kag gas development sa ginabaisan nga katubigan, kag pagpamuhunan sa agrikultura, solar energy, waste-to-energy projects kag electric vehicles.
