Nagapadayon sa subong ang ginapatiayon nga assessment sang mga otoridad matapos maapektuhan sang mabaskog nga pagbaha ang pila ka mga residente sa nagkalain-lain nga barangay sa banwa sang Polomolok bangud sa padayon nga mabaskog nga ulan nga nagluntad sa sulod sang pila ka oras.
Ini ang ginkumpermar ni Nonoy Rhod Dote- Isa ka Principal sa interview sang Bombo Radyo Koronadal.
Suno sa iya, naglapaw ang tubig sa mga suba kag kanal nga amo ang gintunaan sang pag-agas sang tubig papasulod sa mga puluy-an kag pagpalubog sang mga dalan sa iban nga lugar.
Bangud sini, may mga pamilya nga temporaryo nga gin-evacuate kag ginbalhin sa mga evacuation centers agud maprotektahan ang ila kaluwasan.
Madasig naman nga nagresponde dayon ang Municipal Disaster Risk Reduction and Management Office (MDRRMO), Bureau of Fire Protection (BFP), Philippine National Police (PNP), kag iban pa nga rescue volunteers sa paghatag sang agarang bulig kag pag-evacuate sang mga apektado nga residente.
Dugang pa sa sini, nagluntad man ang isa ka landslide sa isa ka resort sa Barangay Maligo, Polomolok, South Cotabato, sa amo man nga adlaw, Hulyo 1, 2026.
Suno sa impormasyon, duha ka motorsiklo ang natabunan kag isa ka mini van ang nabaon sang nagdaguob nga lupa kag putik bangud sa padayon nga ulan.
Sa subong, wala pa sang na-report nga nasamaran ukon napatay sa insidente.
Padayon ang clearing operations kag assessment sang mga kinaukulang ahensya sa apektado nga lugar. Ginpahanumdom sang mga otoridad ang publiko nga likawan ang mga delikado nga lugar nga prone sa pagguho sang duta samtang nagapadayon ang masungit nga panahon.
Nagapadayon man ang monitoring sang mga otoridad sa kahimtangan sang panahon kag sa lebel sang tubig sa mga suba.
Ginpahanumdom ang publiko nga maghalong kag magpabilin nga alerto, labi na ang mga nagaistar sa mga lugar nga masami ginabaha ukon delikado sa kalamidad.
