Natapos na sang Department of Social Welfare and Development (DSWD) ang pagpanagtag sang tig-₱5,000 nga cash assistance sa kapin 1.82 milyon ka public utility vehicle (PUV) drivers kag delivery riders nga naapektuhan sang padayon nga pagsaka sang presyo sang produktong petrolyo.
Suno kay DSWD Assistant Secretary kag spokesperson Irene Dumlao, ginpatigayon ang pagpanagtag halin Marso 17 tubtob Hunyo 30 sa idalom sang Assistance to Individuals in Crisis Situations (AICS) program.
Sa kabug-usan, naglab-ot sa kapin ₱9.139 bilyon ang naipanagtag nga ayuda sa 1,827,827 ka mga benepisyaryo sa bug-os nga pungsod.
Pinakadamo sa mga nakabaton sang bulig amo ang 1,200,009 ka tricycle drivers, ginsundan sang 314,530 ka delivery riders, 119,030 ka jeepney drivers, kapin 104,000 ka motorcycle taxi drivers, kag 89,394 ka transport network vehicle service (TNVS) drivers.
Suno sa DSWD, ginatarget sang programa ang paghatag sang ayuda sa yara sa 2.4 milyon ka PUV drivers base sa listahan nga ginpasumite sang mga local government units (LGUs), Transport Network Companies, pribado nga delivery service providers, Land Transportation Franchising and Regulatory Board (LTFRB), kag Department of Information and Communications Technology (DICT).
Ginpahayag ni Dumlao nga ang diperensya sa tunga sang target kag aktuwal nga ihap sang mga nakabenepisyo posible bangud ang iban sa mga nalista wala na nagatrabaho bilang PUV drivers sang ginpatuman ang programa.
