Nagpadul-ong si Presidente Ferdinand Marcos Jr. pakadto sa Canada sang Miyerkules sang gab-i para sa apat ka adlaw nga official visit nga nagatinguha palig-unon ang kooperasyon sang duha ka pungsod sa patag sang kalakalan, depensa, enerhiya kag rehiyonal nga seguridad.
Suno sa Presidente, makigkita siya kay Canadian Prime Minister Mark Carney agud hisgutan ang pagpalapad sang kooperasyon sa renewable kag nuclear energy, pagmimina, telecommunications, cybersecurity, financial services, kag iban pa nga strategic sectors.
Ginpahayag man ni Marcos nga padayon ang pagsuporta sang Canada sa posisyon sang Pilipinas may kaangtanan sa West Philippine Sea, kag ginalauman niya nga mas mangin aktibo pa ini sa Indo-Pacific kag sa mga inisyatibo sang ASEAN.
Lakip man sa iya programa ang pagpakigkita sa Filipino community sa Canada, nga ginlaragway niya bilang isa sa pinakabaskog nga puwersa sang Pilipinas sa guwa sang pungsod.
