Gin-insister ni Police Staff Sergeant (PSSG) Arla Ray Paciencia nga ilegal nga nagsulod sa iya balay ang iya hinablos nga si alyas “Nash,” isa sa mga menor de edad nga suspetsado sa school shooting incident sa Tacloban City sang Hunyo 22, 2026, kag ginkuha ang iya armas.
Madumduman nga ang armas nga ginapanag-iya sang pulis amo ang gin-alegar nga gingamit sa pagpamusil sa San Jose National High School, nga nagresulta sa kamatayon sang tatlo ka mga estudyante.
Sa pag-atubang sa hearing sang Senate Committee on Women, Children, Family Relations and Gender Equality, ginpahayag ni Paciencia nga ginpilit suno pa ni Nash ang pagsulod sa iya balay kag ginguba ang naka-lock nga locker agud makuha ang armas.
Ginpabutyag man sang pulis nga ang armas yara sa sulod sang isa ka gun box nga ginbutang sa naka-lock nga plastic locker, kag siya lang ang may yabi sang balay kag sang amo nga vault.
Ginkilala man ni Paciencia nga wala niya natago ang armas sa standard safety vault, apang nagasalig siya nga luwas ini bangud siya lang ang nagaestar sa balay.
Sa kasamtangan, yara sa kustodiya sang mga otoridad sanday alyas “Rod” kag “Nash”, samtang ginahulat ang ila pagbalhin sa social welfare and development facility diin sila paga-idalom sa intervention kag rehabilitation program.
