Nagpahayag si Senador Rodante Marcoleta nga handa siya nga magpasakop kag indi magbatok kon ipatuman ang posible nga warrant of arrest batok sa iya may kaangtanan sa mga kaso nga plunder kag indirect bribery.
Suno sa senador, may nabaton siya nga impormasyon nga posible siya arestuhon sa sini nga semana bangud sang reklamo nga ginpasaka may kaangtanan sa gin-alegar nga wala niya pagdeklara sang P75 milyon nga campaign contributions.
Ginpabutyag man ni Marcoleta nga wala siya sang katuyuan nga magresistir sa pag-aresto kag magaupod siya sa mga otoridad sa malinong nga pamaagi kun may ipatuman nga warrant.
Sa pihak nga bahin, wala magkumpirmar ukon magpanginwala ang Philippine National Police (PNP) kon may posible nga warrant nga igaguwa batok sa senador.
Suno naman kay Interior Secretary Jonvic Remulla, wala siya sang nahibaluan nga kaso nga ginpasaka sa Sandiganbayan nga mahimo magresulta sa warrant of arrest.
Padayon nga ginapanginwala ni Marcoleta ang mga alegasyon batok sa iya, kag ginpahayag nga pulitikal kag wala sang basehan ang mga kaso.
Gin-insister man niya nga ang ginatudlo nga pondo halin sa pribado nga mga indibidwal kag indi sa pondo sang gobyerno.
