Nakabatyag sang kahadlok kag kabalaka ang isa ka Filipina nga nagaistar sa Caracas, Venezuela matapos pagyan-igon sang sunod-sunod nga magnitude 7.2 kag 7.5 nga linog ang pungsod sang Hunyo 24, 2026.
Sa interview sang Bombo Radyo Koronadal kay Allen Perez, Bombo International News Correspondent sa Venezuela, ginpahayag niya nga amo ini ang una nga tion sa sulod sang 20 ka tuig niya nga pagpuyo sa nasambit nga pungsod nga nakaeksperyensya siya sang amo kadaku nga paglinog.
Base sa United States Geological Survey (USGS), una nga tumama ang magnitude 7.2 nga linog pasado alas-6:04 sang gab-i, oras sa Venezuela, mga 23 kilometro sa southeast sang Yumare.
Paglabay lamang sang 38 segundo, ginsundan ini sang mas mabaskog nga magnitude 7.5 nga pagyanig.
Ginpaambit man ni Perez nga bangud sa daku nga kadaut nga gindulot sang linog, may pila ka residente nga temporaryo anay nga nagpabilin sa ila balay matapos madaot ang ila mga puluy-an.
Sa pihak sini, nagpasalamat siya nga luwas ang iya pamilya kag kapwa mga Pilipino sa Venezuela.
Samtang, gin-deklara ni Interim President Delcy Rodriguez sang Venezuela ang State of Emergency samtang nagapadayon ang search and rescue operations sa mga apektado nga lugar.
Sa pinakahuli nga report sang gobyerno, kapin 920 na ang napatay, 3,360 ang nasamaran, 172 ang ginapatihan nga na-trap, kag sobra 50,000 ang ginreport nga nadula. Padayon naman ang pag-abot sang bulig halin sa nagkalain-lain nga pungsod agud suportahan ang mga komunidad nga naapektuhan sang trahedya.
