Ginpabutyag ni House Prosecution Spokesperson kag Lanao del Sur Rep. Zia Alonto Adiong nga posible nga ang selyado nga BIR box nga nagalakip sang mga income tax return kag iban pa nga financial records amo ang mangin isa sa pinakamabug-at nga ebidensya sa impeachment trial ni Vice President Sara Duterte.
Suno kay Adiong, importante ang mga dokumento agod masusi ang alegasyon sang unexplained wealth paagi sa pagkumparar sini sa SALN sang Bise Presidente.
Gindugang niya nga ang pagbukas sang kahon kabahin lamang sang inventory kag pagmarka sang mga dokumento kag indi pa ini nagakahulugan nga ginbaton na bilang ebidensya.
Sa pihak nga bahin, ginpahayag ni defense spokesperson Atty. Michael Poa nga ang Senate Impeachment Court lamang ang may awtoridad nga magdesisyon sa mga mosyon sang tagsa ka kampo.
Sa karon, yara pa sa kustodiya sang impeachment court ang BIR box kag nagahulat pa sang desisyon kon batonon ini bilang opisyal nga ebidensya sa impeachment trial.
