Nagdangat na sa indi magnubo sa 164 ka tawo ang napatay kag 971 ang pilason matapos tay-ugon sang duha ka mabaskog nga linog ang Venezuela, suno kay Interim President Delcy Rodriguez.
Suno sa United States Geological Survey (USGS), una nga nag-igo ang magnitude 7.2 nga patay-og malapit sa San Felipe, 284 kilometro sa West Caracas, sang Miyerkules sang gab-i kag ginsundan ini sang magnitude 7.5 nga pagtay-og malapit sa Yumare, mga 293 kilometro sa west sang kapital.
Bangud sa impact sang linog, narumpag ang madamo nga mga building sa sulod kag palibot sang Caracas.
Nagapadayon ang search and rescue operations agud maluwas ang mas madamo pa nga mga tawo nga posible naipit sa naguba nga mga istruktura.
Suno kay Rodriguez, isa ini ka dako nga trahedya kag ginpadala niya ang pakigsimpatya kag suporta sa mga pamilya nga nadulaan sang ila mga hinigugma.
Ginpaandam naman sang USGS paagi sa ila predictive modelling nga posible pa magdamo ang bilang sang mga nautasa kag mahimo ini maglapaw sa linibo.
Nagpahayag si US President Donald Trump nga preparado ang Estados Unidos nga maghatag sang bulig sa pagresponde sa kalamidad.
Ginpahayag man sang US Secretary of State nga nagapadala sila sang search and rescue teams, medical resources, kag humanitarian assistance sa Venezuela.
Nagpaabot man sang suporta ang iban nga mga pungsod lakip ang El Salvador, Dominican Republic, Australia, kag Brazil.
