Pormal na nga nagsaka sang mga kriminal nga kaso ang mga awtoridad batok sa 15-anyos nga estudyante nga ginatudlo nga isa sa mga responsable sa maduguon nga pagpamusil sa San Jose National High School sa Tacloban City.
Ang insidente nagresulta sa pagkapatay sang tatlo ka estudyante samtang 15 pa ang nasamaran, bagay nga naghatag sang daku nga kakulba sa komunidad kag sa sektor sang edukasyon.
Isa man ka 14-anyos nga estudyante ang yara subong sa kustodiya sang mga awtoridad bangud sa iya ginapatihan nga partisipasyon sa krimen. Ang duha ka menor-de-edad ginpasakop sa pag-atipan sang City Social Welfare and Development Office samtang nagapadayon ang imbestigasyon.
Base sa inisyal nga mga resulta sang pag-usisa, isa sa mga ginatan-aw nga posibleng motibo amo ang bullying. Apang ginpaklaro sang Police Regional Office 8 nga wala pa ini makonsiderar nga pinal nga konklusyon kag padayon pa ang mas madalom nga pag-imbestigar sa tanan nga posible nga hinungdan sang trahedya.
Suno sa pulisya, wala nila ginatabog ang iban pa nga mga anggulo kag padayon nga ginahibaluan ang tanan nga impormasyon kag ebidensya nga ila nakolekta.
Nagaguwa man sa imbestigasyon nga posible nga mas madamo nga mga lupok ang ginpalupok sang mas bata nga suspetsado, isa ka detalye nga ginatan-aw sang mga imbestigador sa pagrekonstrak sang natabo nga insidente.
Samtang nagapadayon ang kaso, ginaiimbestigahan man ang isa ka babayi nga pulis nga tiyahin sang isa sa mga suspetsado matapos mabuyagyag nga posible nga ang iya armas amo ang nagamit sa pagpamusil.
Bangud sini, ginbutang na sa restrictive custody ang nasambit nga opisyal kag temporaryo nga ginpahalin sa iya posisyon samtang ginapadayon ang administrative investigation may kaangtanan sa posible nga paglapas sa mga regulasyon sa pagtipig kag pagdumala sang armas.
Ginpahayag man sang PRO 8 nga ginatun-an nila ang posibilidad nga lakipon sa mga mahimo nga kasuhan ang mga ginikanan sang mga suspetsado, ilabi na kon mapamatud-an nga may kakulangan sa pagdumala ukon pag-atipan nga nagresulta sa insidente.
Sa pihak sang nagalapta nga mga espekulasyon, ginpasiguro sang kapulisan nga duha lamang ka menor-de-edad ang direkta nga nalakip sa pagpamusil kag wala na sang iban pa nga estudyante nga ginkabig nga aktuwal nga partisipante sa pag-atake.
Padayon naman ang panawagan sang mga pamilya sang mga biktima para sa hustisya samtang nagapangayo sang mas mahigpit nga seguridad sa mga eskwelahan agud malikawan ang pagliwat sang pareho nga trahedya sa palaabuton.
