Magahiwat sang isa ka panibag-o nga malakihon nga “Trillion Peso March” ang mga lider sang Simbahang Katolika, iban pa nga religious groups, kag civil society organizations sa Hunyo 28.
Ini nga pagtililipon kasunod sang mga una nga protesta nga nagapanawagan sang pananabat sa tunga sang mga eskandalo sang korapsyon sa pungsod.
Suno kay Bishop Colin Bagaforo, lead convenor sang Catholic Bishops’ Conference of the Philippines (CBCP) Inter-Religious Leaders’ Council for National Transformation kag Obispo sang Kidapawan, kag ini pagatawgon nga “White Ribbon Movement March” ang nasambit nga rally.
Himuon ang aktibidad sa People Power Monument, nga iya ginlaragway bilang isa ka pagkilos nga faith-based, faith-generated, kag bunga sang pagpanumdum, pag-ampo, pagpamati, kag shared responsibility sa Diyos.
Magsugod ang martsa sa udto pakadto sa monumento.
Tumong sini nga ipahanumdom sa gobyerno nga ang mga Pilipino nagakaangay sang mas maayo nga palaabuton, nga mahimo lamang paagi sa matinlo nga pulitika nga nagaserbisyo sa interes sang pumuluyo, nagatipig sang dignidad sang tawo, kag ginagiyahan sang hustisya sa baylo sang kinagamo.
Ginpahayag man sang obispo nga dapat panabton kag ipapriso ang mga imbolbado sa korapsyon.
Kaupod sini, ipanawagan man ang pagpasa sang matuod-tuod nga layi kontra political dynasty.
Gin-imbitar man ni Bishop Bagaforo ang tanan nga religious groups, civil society, non-government organizations, educational associations, lakip ang mga mangunguma, manugpangisda, kag mga mangunguma nga mag-upod sa rally.
Nagpanawagan man siya sang paghiusa sa pag-ampo agud pamation sang Diyos ang tingog sang katawhan, magbag-o ang sistema sang pang-gobyerno, kag mamati ang mga korap sa tingog sang kamatuoran.
