Naglab-ot na sa 20 ka pusil nga narehistro kay Sen. Ronald “Bato” Dela Rosa ang boluntaryo nga ginsungka sa Philippine National Police (PNP) sa Davao City matapos bawion ang iya lisensya kag rehistro sang armas kun sa diin yara na sa karon sa kustodiya sang Regional Civil Security Unit 11 para sa safekeeping.
Suno sa PNP, ang pagbawi sang lisensya suno sa Republic Act No. 10591 ukon Comprehensive Firearms and Ammunition Regulation Act, nga nagadumili sa bisan sin-o nga may kaso kriminal nga may penalidad nga sobra sa duha ka tuig nga magpanag-iya sang armas.
Base sa record sang PNP-Firearms and Explosives Office (FEO), may Type 5 License to Own and Possess Firearms (LTOPF) si Dela Rosa nga nagahatag kahigayunan sa pagpanag-iya sang sobra 15 ka pusil.
Sa kabug-usan, 117 ka pusil ang narehistro sa iya ngalan kag tanan ini gin-ordon nga isungka sa mga otoridad.
Ang revocation order ginpagwa sang Mayo 26, 2026, kasunod sang direktiba sang Department of Justice nga ipatuman ang International Criminal Court (ICC) arrest warrant batok kay Dela Rosa may kaangtanan sang mga kaso nga crimes against humanity nga naghalin sa madugo nga kampanya kontra droga sang administrasyong Duterte.
Madumduman nga nagserbe si Dela Rosa bilang PNP Chief gikan 2016 tubtob 2018, isa sa mga mayor nga personalidad nga ginatumbok nga may kahilabtanan sa libu-libo nga kamatayon sa war on drugs.
Sa pihak sang revocation, ginpahanugutan sang PNP nga ang mga ginsungka nga pusil magapabilin sa ila kustodiya para sa husto nga disposisyon.
Padayon nga ginamonitor sang mga otoridad ang sitwasyon agud masiguro ang pagsunod sa layi kag mapabilin ang kaayuhan sa tunga sang mga kaso nga ginapanagiyahan sang senador.
