Natalana nga isumiter sang House prosecution team ang ila pre-trial brief sa Senate Impeachment Court subong nga Lunes, Hunyo 15, suno sa ginpatuman nga schedule para sa impeachment case batok kay Vice President Sara Duterte.
Pangunahan ni Batangas Rep. Gerville Luistro ang pagsumiter sang nasambit nga dokumento nga nagalakip sang importante nga mga detalye para sa masunod nga trial sa Senado.
Suno kay Luistro, importante ini nga bahin sang proseso bangud yara diri ang “stipulation of facts” ukon mga kamatuoran nga indi na kinahanglan diskusyunan sang duha ka bahin.
Igapresentar man sini nga tion sang prosekusyon kag depensa ang mga ebidensya kag pahayag nga ila ginabaton ukon ginakakontra.
Ginpahayag sang mamalidha nga kun magkaisa ang duha ka panig sa isa ka kamatuoran, indi na ini kinahanglan nga pamatud-an pa sa trial, gani mapadasig kag mapahapos ang trial.
Apang kun indi ini pagbatunon sang pihak nga kampo, obligasyon sang naghain nga pamatud-an ini paagi sa pagpresentar sang mga ebidensya kag testigo.
Dugang pa ni Luistro, ang tumong amo ang pagpaklaro sang mga isyu nga pagatalakayon sang duha ka kampo agud mangin mas episyente ang proseso sang trial.
Madumduman nga gin-iskedyul sang Senate Impeachment Court ang pre-trial conference sa Hunyo 18 agud pormal nga talakayon ang mga stipulation, listahan sang mga testigo, kag pagmarka sang mga dokumento nga gamiton bilang ebidensya sa kaso.
