Nagapadayon ang pag-atubang sang mga pagtilaw ang Koronadal Central Elementary School 1 (KCES 1) bangud sang pila ka hulot-klasehan nga ginakabig na nga delikado kag gin-subject na para sa demolition.
Ginpahayag ni Principal I Emeline Doruelo sang Koronadal Central Elementary School 1, nga ginaprioridad na sang mga ahensya sang gobyerno ang buluthuan agud matapna ang problema sa mg daan na kag nagakahuyang nga mga bilding.
Suno kay Doruelo, nga bisan may mga classrooms nga dapat na tani gindemolis, napilitan gihapon ang eskwelahan nga gamiton ini tungod sa kakulang sang alternatibo nga mga hulot-klasehan.
Dugang pa ni Doruelo, nga may mga Grade 1 kag Grade 5 learners nga nagagamit pa sang mga classroom nga may rekomendasyon na para sa pagbungkag.
Sa pihak sini, ginahimo sang administrasyon ang tanan nga mahimo nga temporaryo nga solusyon, lakip ang pag-ayo sang mga atop nga nagatulo kag pagpatuman sang mahugot nga disaster preparedness measures.
Ginasiguro man sang buluthuan, nga may insakto nga orientation ang mga estudyante kag mga maestro agud mangin preparado sa kaso sang linog ukon iban pa nga emerhensya.
