Ginpabutyag ni City Administrator Vicente de Jesus nga dako ang potensyal sang lokal nga panguluhan nga makahatag sang madamo nga kauswagan sa masunod nga mga binulan paagi sa pagpaandar sang nagkalain-lain nga departamento kag mga programa sang syudad.
Sa interview sang Bombo Radyo Koronadal, ginpahayag ni De Jesus nga isa sa mga importante nga tutukan sang administrasyon ni Mayor Erlinda Araquil amo ang pag-plastar sang matuod nga mga problema antes maghimo sang solusyon.
Suno sa iya, kinahanglan nga usisaon kag rebisahon ang mga ordinansa kag polisiya nga posible nagaapekto sa operasyon sang mga pasilidad pareho sang pampubliko nga palengke, terminal kag iban pa nga mga serbisyo sang gobyerno.
Ginhatagan nya pagtamod ang importansya sang pagrepaso sa mga route plan, zoning ordinances, budget implementation kag mga proseso sa pagkuha sang business permits agud mapahapos ang transaksyon sang publiko kag malikawan ang sobra nga burukrasya.
Dugang pa ni De Jesus, isa sa iya mga prayoridad bilang administrador amo ang pagpauswag sang disiplina kag accountability sa han-ay sang mga empleyado sang syudad, lakip na ang pagpasiguro nga nasunod ang mga polisiya may kaangtanan sa serbisyo publiko kag anti-red tape measures.
Nagpasalamat man siya kay Mayor Araquil sa pagsalig sa iya nga mangin kabahin sang administrasyon. Gindugang ni De Jesus, handa siya nga ipaambit ang iya eksperyensya bilang anay alkalde kag bise gobernador agud mabuligan ang mas bata nga henerasyon sang mga empleyado sang gobyerno.
Ginhingyo man ni De Jesus ang padayon nga pagtinir kag pagpatuman sang mga programa nga iya ginbuligan sang una, lakip na ang mga inisyatibo nga nagresulta sa pag-uswag sang Koronadal bilang regional center, nga suno sa iya naghatag sang daku nga benepisyo sa ekonomiya kag sa pangabuhi sang mga pumuluyo sang syudad.
