Nagpalag ni Senate President Alan Peter Cayetano sa pagpanghangkat ni Sen. Raffy Tulfo nga mag-atubang sa sesyon sang senado kag pamatud-an ang iya “independence” kag indi matalaw.
Sa isa ka Facebook Live, ginpahayag ni Cayetano nga indi simple nga pagtambong sa session ang isyu sa diin ginahalimbawa niya ang isa ka mangunguma nga ginpadala sa talamnan sa tunga sang bagyo ukon isa ka soldado nga ginpadala sa “suicide mission.”
Gin-akusahan man ni Cayetano ang kampo sang mag-utod nga Tulfo kag ginpahayag nga malapit lang sila sa Malacañang.
Ginpakalain man sang Senate President ang mga alegasyon nga siya ang yara sa likod sang paguntat sang aircon kag internet sa Senado nga suno sa iya malayo sa matuod nga isyu.
Samtang ginpasalig man ni Cayetano nga indi maggamit sang anuman nga taktika ang mayorya batok sa mga minority senators kag nagpanindugan nga ipatuman niya ang fair leadership sa senado.
Apang, ang Presidente sang Senado nagsiling nga ang mga isyu sa karon ginapasobrahan sang minorya kag ang isyu nangin personal sa baylo nga pormal nga mga butang sa parliamento.
Nagtuhaw ang tensyon matapos ang asud-asud nga absences sa plenary sessions bangud sa indi pagtambong sang majority bloc, nga nagresulta sa delay sang pila ka mga hagna.
Bangud sini, ginpanawagan sang minority bloc ang pagbiya kay Cayetano, bangud sa ginaalegar “abandonment of responsibility” kag paglapas sa mga pagsulundan sang Senado.
