Ginapabug-atan sang International Criminal Court (ICC) nga nagadepende sa kooperasyon sang gobyerno sang Pilipinas ang pagpatuman sang mga arrest warrant kag ang pagsungka sang mga suspek sa tribunal.
Ini may kaangtanan sa kumpirmasyon ni ICC spokesperson Oriane Maillet nga may yara na sang warrant of arrest batok kay Senador Ronald “Bato” dela Rosa, nga ginakabig bilang gina-alegar nga “co-perpetrator” ni anay Presidente Rodrigo Duterte sa mga kaso nga crimes against humanity may kaangtanan sa “war on drugs.”
Ginbuhat ang pahayag sang opisyal sang ICC pagkatapos sang lagsanay kag indi madakop nga operasyon sang mga ahente sang National Bureau of Investigation (NBI) batok sa Senador sa sulod sang Senado.
Suno kay Maillet, bangud nga ang ICC isa ka institusyon nga panghukuman nga nagaasalig sa kooperasyon sang mga estado, ang pagdakop kag pagsungka sa suspek yara sa kamot sang mga nasyonal nga awtoridad.
Ginpaathag man niya nga kun may mga kabalaka ang estado bahin sa kooperasyon, mahimo sila magpakonsulta sa korte suno sa Rome Statute.
Gindugang pa sang opisyal sang ICC nga bisan nag-withdraw ang Pilipinas sa korte sang 2019, indi ini makaapekto sa obligasyon sini nga magkooperar sa mga kriminal nga imbestigasyon kag trial, suno sa Article 127 sang Rome Statute.
