Nag-engkwentrohanay ang Tropa sang 79th Infantry (Masaligan) Battalion kag katapo sang communist terrorist group (CTG) sa Barangay Salamanca, Toboso, Negros Occidental nga nagresulta sa pagkapatay sang 19 ka mga katapo sang New People’s Army (NPA). Lakip sa mga napatay amo si Lyle Prijales nga ginpahayag katapo sang Anakbayan-USA.
Suno sa inisyal nga report gikan sa yunit nga nagpatigayon sang operasyon, nakapatigayon sang focused military operations ang 79th Infantry Battalion matapos makabaton sang impormasyon gikan sa mga lokal nga pumuluyo angut sa presensya sang armado nga mga elemento sang CTG sa lugar.
Pag-abot sa target nga lokasyon, ginsugata sang armado nga pagbato ang mga tropa nga nagresulta sa malip-ot nga pagbayluhanay sang lupok.
Matapos ang engkwentro, narekober sang tropa ang bangkay ni Prijales upod ang mga armas luthang kag iban pa nga kagamitan sa inaway. Wala naman sang may nareport nga casualty sa bahin sang pwersa sang gobyerno.
Ginhatagan pagtamod sang Philippine Army nga ang operasyon ang kabahin sang ila padayon nga pagtinguha agud mabungkag ang mga rebel networks kag mapasiguro ang kaluwasan kag seguridad sang mga komunidad sa Isla sang Negros.
Ginsulit man sang mga opisyal sang militar ang ila kabalaka sa padayon nga pag-intra sang mga indibidwal nga gina-alegar may kaangtanan sa mga militante nga organisasyon sa armadong paghimakas.
Gin-engganyo sang mga otoridad ang publiko nga magsalig lamang sa verified nga impormasyon halin sa authorized sources samtang nagapadayon ang imbestigasyon.
