Naghatag sang magkasumpong nga pahayag si US President Donald Trump nahanungod sa kinagamo sang Amerika kag Iran samtang nagapalapit ang katapusan sang 14 ka adlaw nga ceasefire.
Nagpahayag si Trump nga wala siya nagadali sa pagresolba sang kinagamo, apang posible gihapon ang bag-o nga negosasyon sa Pakistan.
Suno kay Trump, posible nga magpadala gihapon ang US sang team para sa talks bisan nagasikway ang Iran samtang wala pa ginabag-o sang Washington ang iya posisyon.
Nagpaandam man siya nga mahimo pa nga maglala ang sitwasyon kun wala sang kasugtanan sa tunga sang duha ka pungsod.
Sa pihak nga bahin, ginpanindugan sang Iran nga indi sila makig-negosasyon sa idalom sang pamahog kag gin-akusaran ang US nga wala nagtuman sa kasugtanan sang ceasefire deal agreement.
Sa sini nga kahimtangan, nagpabilin nga wala sang klaro kun ini magaresulta sa panibag-o nga peace talks ukon dayunon nga mabungkag ang ceasefire sa Middle East.
