Ginpasiguro sang City Traffic Management Office sang Koronadal nga padayon nga i-monitor ang illegal parking sa syudad, apisar pa nga may pila ka traffic enforcers nga nagahulat sang ma-renew ang ila kontrata.
Sa interview sang Bomnbo Radyo Koronadal, ginpahayag ni Joy Placer – City Traffic Head sang City Traffic Management Office sang Koronadal, nga ginaplano karon ang pagbalhin sang terminal sang mga tricycle drivers pakadto sa sulod sang merkado publiko.
Suno sa iya, ginpatigayon ang initial nga plano kaupod ang Market Management Office, Task Force Kaayusan, kag Traffic Management Office, agud mahibaluan kun paano ini epektibo nga ma-implementar, upod ang Barangay Development Program.
Ginpahayag man ni Placer nga gin-install na ang mga wiring para sa mga tents bilang kabahin sang preparasyon.
Sa pihak sini, ginahulat pa sang opisina ang kumpleto nga listahan sang mga personnel nga ma-renew ang kontrata.
Samtang ginbalhin ang terminal, ginbutangan na sang mga signages ang ginhalinan sang mga tricycle drivers nga naga-indikar “No Parking,” kag gin-deploy ang mga traffic personnel sa sulod kag gwa sang merkado agud masiguro ang kaayusan kag kahilwayan sang dalan.
Sa kabug-usan, may yara sang 112 ka mga personnel ang City Traffic Management Office nga naga-serbisyo sa syudad.
Bangud sini, nagpanawagan si Placer sang pagsinabtanay halin sa mga tricycle drivers kag pasahero, ilabi na sa masaka nga presyo sang mga balaklon kag gatong, agud malikawan ang mas lala nga sitwasyon sa transportasyon sa Koronadal.
