Nagapadayon ang kampanya sang militar batok sa violent extremist matapos matapos ang madinalag-on nga boluntaryo nga pagsungka sa gobyerno sang 13 viiolent extremist sa Maguindanao del Sur.
Sa interview sang Bombo Radyo Koronadal, ginpahayag ni 6th Infantry Division spokesperson Lt.Col. Ronald Suscano nga ang mga nagsungka amo ang kombinasyon sang anay miyembro sang Bangsamoro Islamic Freedom Fighters (BIFF) kag Dawlah Islamiya nga sakop sa 38th Infantry Battalion.
Ginpresentar ang mga ini kay Brigadier General Edgar Catu sang 601st Infantry Brigade upod ang Philippine National Police kag mga opisyales sang lokal nga gobyerno sang Datu Piang.
Samtang, gin-turn over man sang mga nagsungka ang nagkalain-lain nga high-powered firearms lakip ang mga mortar, grenade launcher, RPG, sniper rifle kag submachine guns.
Apang spiar may mga nagbalik na sa sabakan sang gobyerno, gin-ako ni Suscano nga may yara pa gihapon sang nagapabilin nga mga grupo sa pila ka bahin sang Maguindanao del Sur, lakip na ang Datu Piang kag Mamasapano, nga padayon nga ginabantayan sang militar.
Padayon man ang panawagan sang militar sa nabilin nga mga miyembro sang armado nga grupo nga magdesisyon na sa pagbalik sa sabakan sang gobyerno agud malikawan ang mga kinagamo kag mapabakod ang kalinong kag katawhay sang komunidad.
Sa karon, ginaproseso na ang mga benepisyo nga ila pagabatunon sa idalom sang Balik-Baril Program, nga nagahatag bulig sa mga anay rebelde nga nagadesisyon nga magbalik sa sabakan sang gobyerno.
