Mabaskog nga ginpahayag ni Ramil Madriaga sa hearing sang House Committee on Justice nga wala sang bisan sin-o nga nagpwersa sa iya, nagbayad, ukon nagpromisa sang iya kahilwayan kabaylo sang iya mga ginpanumpaan nga pahayag may kaangtanan sa mga alegasyon batok kay VP Sara Duterte kag sa iya pamilya.
Suno kay Madriaga, boluntaryo kag sa iya kaugalingon nga desisyon ang paghimo sang iya affidavit kag supplemental affidavit, kag ginpabutyag niya nga wala siya nagapangayo sang bisan ano nga kabaylo.
Nangin sentro sang pamangkot ni Deputy Speaker kag Iloilo Rep. Janette Garin kun ngaa nagdesisyon sia magpahayag, kun sa diin ginsabat ni Madriaga nga katungod sang publiko nga mahibaluan ang gin-alegar iregularidad may kaangtanan kay Harry Roque, ilabi na ang isyu sang gin-alegar nga land grabbing kag ang ginapahayag niya nga kakulangan sang aksyon ni Duterte.
Gindugang ni Madriaga nga dapat mahibaluan sang katawhan ang “kalokohan” ni Roque nga suno sa iya ginaproteheran sang Bise Presidente, kag ginpahayag man niya nga indi lang ini naga-igo sa isa ka lugar kundi may mga kaso man sa iban nga bahin sang Luzon, lakip na ang Zambales kag Pangasinan nga apektado ang mga mangunguma.
Gintumod niya ang mga mangunguma sa Mariveles, Bataan nga dapat kuntani makabaton sang Certificate of Land Ownership Awards halin sa Department of Agrarian Reform, apang nagkabulagay ang sitwasyon sang nag-upod siya sa pagpang-intra sa plano nga pag-usar sang duta para sa Philippine Offshore Gaming Operators (POGOs).
Sa iya affidavit, gin-angkon man ni Madriaga nga nagserbi siya bilang “bagman” kag political officer nga nagatutok sa intelligence gathering para sa pamilya Duterte.
Sa karon, nagapadayon ang imbestigasyon sang Kamara sa mga gin-alegar sini nga mga insidente.
