Ginpriso sang kapulisan sa Macau, China ang humanoid robot matapos ginpasuni nga ginpahog sini ang 70-anyos nga babaye.
Natabo ang insidente sang gab-i sang ang babaye nagalakat malapit sa Lok Yeung Fa Yuen residential complex sa Patane sang nagligad nga Huwebes, suno sa South China Morning Post (SCMP).
Ang robot, isa ka Unitree G1 model, hinali nga nagdulog sa likod sang babaye samtang ini ang nagatsekyar sang iya telepono. Nanotisyahan niya ang robot, nag-panic siya kag nagsinggit.
Ang video sang insidente naglapta sa madamo nga nag-share sa social media platforms, nga madamo sang naglahog nga ang robot gindakop. Ang iban nabakala tuhoy sa safety kag regulation sang mga robot sa public areas.
Makita sa viral video ang duha ka pulis nga nagpatunga kag gin-updan ang robot palayo.
Ila man ginpaandaman ang operator sang robot, ang 50-anyos nga lalaki, kag ginhambalan siya nga mangin mahinalungon sa pag-usar sang robot sa public spaces.
Ang robot ginbalik man sa iya.
Suno sa local broadcaster, ang robot gintestingan sang local education centre.
Si Towin Mak, ang tiglawas gikan sa education centre, nagsiling sa local broadcaster Teledifusao de Macau (TDM) nga ang komprontasyon nagluntad sang ang robot nagbiya sa lugar. Nagtindog ini sa likod sang babaye sa paghulat sa iya nga maghawan ang alagyan, suno kay Mak.
Ang Unitree G1 robot isa ka commercial humanoid robot nga nagatindog sang kapin sa apag ka tapak nga kataason kag gindesinyo para sa promotional kag educational purposes. May yara ini sang advanced obstacle avoidance systems kag depth cameras.
