Nagapadayon sa subong ang imbestigasyon sang mga otoridad sa insidente sang pagpangluthang sa isa ka 65-anyos nga retirado nga manunudlo sa bahin sang Abellera St., Poblacion, Kabacan, Cotabato.
Ginkilala sang mga otoridad ang nasambit nga biktima nga si Salina Timpolok Genso, residente sang Plang Village sa nasambit nga lugar Suno sa inisyal nga imbestigasyon sang Kabacan PNP, yara sa isa ka Carwash sang hinali nga ginpalapitan ini sang duha ka mga riding-in-tandem suspects kag ginluthang sang malapitan.
Nagsustiner sang igo sang bala sa lawas ang biktima nga nangin tunaan sang kamatayon sini. Narekober sang mga otoridad sa crime scene ang tatlo ka mga basyo sang bala nga ginapatihan ang halin sa .45 caliber nga pistola nga gin-usar sa krimen.
Gintilawan pa nga idangat sa balay-bululngan ang biktima apang gindekalarar ini nga Dead on Arrival. Madasig naman nga nagpalagyo ang mga suspek sa lugar makaligad ang krimen padulong sa national highway sakay ang isa ka motorsiklo.
Padayon naman sa subong ang ginahimo nga hot pursuit operation sang mga kapulisan batok sa mga nakapalagyo nga mga suspek.
Padayon naman sa subong nga ginarekober sang mga otoridad nga mga CCTV Footage nga posible nakakuha sang plaka kag identity sang nasambit nga mga suspek.
