Nakauli na sa Pilipinas ang 90 ka mga Overseas Filipino Workers (OFW) upod ang ila pamilya halin sa United Arab Emirates (UAE) bangud sa padayon nga kinagamo sa Middle East.
Suno sa Department of Migrant Workers (DMW), nag-abot ang mga OFW sang gab-i sang Marso 8 sa Ninoy Aquino International Airport Terminal 3.
Ginakabug-usan ini sang 33 ka mga OFW nga nag-avail sang gin-offer sang gobyerno nga voluntary repatriation program, samtang ang iban naman amo ang mga OFW nga na-stranded sa Dubai.
Ginsugata sila sang mga opisyal sang DMW sa pagpanguna ni Hans Leo Cacdac, Secretary sang DMW, kag mga personnel sang Department of Social Welfare and Development (DSWD) nga naghatag man sang nagakaigo nga bulig kag assistance sa pag-abot sang mga repatriates.
Suno sa rekord sang DMW, halin sang Marso 5 yara na sa 399 ka mga OFW kag 12 ka OFW dependents ang luwas nga nakauli sa Pilipinas bangud sa nagalala nga sitwasyon sa Middle East.
Samtang, ginpahayag man sang Department of Foreign Affairs (DFA) nga may 11 ka mga Filipino nga luwas nga nakaguwa sa Iran kag ginpangdala sa Türkiye.
Padayon naman nga ginabuligan sang DFA ang ginabulubanta 800 ka mga Filipino kasamtangan yara sa Iran agud masiguro ang ila kaluwasan.
