Trauma kag kahadlok sa subong ang nabatyagan sang isa ka Overseas Filipino Worker (OFW) sa pungsod Qatar bangud sa mga serye sang asud-asud nga pagpalupad sang Iran sang missiles sini sa mga military bases sa pungsod.
Ini ang nabatyagan ni Ella Solivio – Bombo International Correspondent to Qatar sa interview sang Bombo Radyo Koronadal.
Suno sa iya, makaligad nga nagluntad ang pagpang-atake sang Iran sa ila nga pungsod, kakulba na ang mabatyagan sini bangud sa posibilidad nga magsulod naman liwat ang mga missiles sang Iran.
Ginpakigbahin man sini nga mas makahaladlok man ang ila nga sitwasyon bangud wala suno pa sang bomb shelter ang balay na gina puy-an sini sa diin wala ini sang makadtuan sa tion nga may magsulod na naman nga missile.
Ginpahayag man sini nga apisar pa nga may mga mabaton sila nga mga notifications nga naga hatag sang alerto sa mga residente sa tion nga may mag sulod nga missiles, makulbaan sa gihapon ang mga ini bangud wala sila sang mapag-on nga mapanaguan parehas sang bombshelter sang Israel.
Dugang pa niya, kulukasubong nga indi man sila makatulog bangud sa kahadlok sang mga magaluntad nga sitwasyon.
Ginpasiguro man sini sa pamilya niya sa banwa sang Sto. Niño, South Cotabato nga wala sang dapat nga ikabalaka ang mga ini bangud naga paninguha man sila nga makasurvive sa sitwasyon.
