Ginpakigbato sang common legal representative sang mga biktima sang drug war nga si Gilbert Andres ang argumento sang depensa nga wala gin-uyonan sang administrasyon ni Rodrigo Duterte ang mga “rotten” nga pulis.
Sa iya closing statement bilang counsel sang mga biktima, ginpahayag ni Atty. Andres nga wala gid may ginpasakaan sang kaso kriminal batok sa mga pulis nga responsable sa kamatayon sang 3,967 ka drug personalities nga napatay sa mga operasyon kontra droga halin Hulyo 1, 2016 tubtob Nobiyembre 27, 2017.
Gintumod man ni Atty. Andres ang desisyon sang chamber sang Pebrero 26, 2023 may kaangtanan sa awtorisasyon suno sa Article 18, Paragraph 2 sang statute agud ipadayon liwat ang imbestigasyon.
Nagpanindugan ang counsel sang mga biktima nga may yara sang nagakaigo nga ebidensiya agud makumpirmar ang mode of liability sa idalom sang Article 25, suno sa ginapangabay sang prosekusyon.
Sa katapusan, ginpahayag ni Atty. Andres nga may yara sang igo nga ebidensiya nga ginpresentar ang prosekusyon agud maglatag sang substantial grounds sa pagtuo nga nahimo sang anay pangulo ang tagsa ka krimen nga gin-aakusar batok sa iya.
