KORONADAL CITY – Paglapas sa Cybercrime law ang pagpalapta sang mga pribado nga video kag indi beripikado nga mga impormasyon.
Ini ang nangin pahayag ni Police LtCol. Peter Pinalgan Jr., Chief of Police, Koronadal City PNP, may kaangtanan sa mga nagalapta nga pribado nga video sa social media, sa interview sang Bombo Radyo Koronadal.
Suno kay Pinalgan, paglapas sa laye ang mga pagpalapta sang sala nga impormasyon kag pribado nga video sa social media bangud ini sakop sa kampanya sang mga otoridad batok sa cybercrime.
Ginpahayag pa niya nga mahimo makasuhan kag mapriso ang mga imbolbado sa pag-share kag pagpasend sang mga pribado nga video sa social media.
Bangud sini, nagpanawagan si Pinalgan sa publiko nga mangin responsable sa pag-usar sang social media bangud ini mahimo makabulig ukon maka-apekto sa isa ka indibidwal.
