Naglabas ng desisyon ang Supreme Court (SC) En Banc na tuluyang ibasura ang mosyon ng Kamara ng mga Kinatawan na humihiling na baligtarin ang naunang ruling noong Hulyo 25, 2025, na nagsasaad na labag sa Konstitusyon ang impeachment na inihain laban kay Vice President Sara Z. Duterte.
Ayon sa SC, ang ika-apat na reklamong impeachment na isinumite sa Senado noong Pebrero 5, 2025 ay malinaw na ipinagbabawal sa ilalim ng Article XI, Section 3(5) ng Konstitusyon, na nagtatakda ng limitasyon sa paghahain ng impeachment sa loob ng isang taon.
Hindi lumahok sa pagtalakay ng kaso si Associate Justice Alfredo Benjamin Caguioa, habang si Associate Justice Maria Filomena Singh ay naka-leave noong panahong iyon. Ipinaliwanag din ng Korte na ang unang tatlong reklamo ng impeachment ay hindi naisama sa Order of Business ng Kamara sa loob ng itinakdang sampung session days, kaya’t hindi ito umusad sa proseso.
Binigyang-diin pa ng SC ang pagkakaiba ng dalawang pamamaraan ng impeachment: ang una ay dumaraan sa masusing pagtalakay ng Committee on Justice, samantalang ang ikalawa ay agad na nagiging balido kapag may pirma ng hindi bababa sa isang-katlo ng lahat ng miyembro ng Kamara, kahit wala nang pagdinig sa komite.
