KORONADAL CITY – Mahigpit na kinokondena ng Armed Forces of the Philippines (AFP) ang walang saysay at marahas na pananambang na naganap bandang alas-10:20 ng umaga ngBiyernes, Enero 23, 2026, sa Barangay Liningding, Munai, Lanao del Norte, na ikinamatay ng apat na sundalo, kabilang si Sgt. Diosito Araya na mula sa Barangay Matapol, Norala, South Cotabato.
Kasangkot sa insidente ang mga tauhan ng Task Unit TABANG na nasa ilalim ng 2nd Mechanized Infantry Brigade ng Philippine Army kung saan pinaniniwalaang isinagawa ang pag-atake ng mga natitirang miyembro ng Dawlah-Islamiyah Magued group- na isang lokal na grupong terorista.
Si Sgt. Diosito Araya, kabilang sa isang Civil-Military Operations unit, ay kilala sa kanyang dedikasyon sa paglilingkod sa komunidad at sa pagbibigay ng makataong tulong.
Ang iba pang nasawing sundalo ay sina Sgt. Gilbert Arnoza, Sgt. Junel Calgas, at Private Sean Mark Laniton. Lahat sila ay idineklarang dead on the spot dahil sa tinamong tama ng bala.
Samantala, si Corporal Dela Cruz ay nasugatan at agad na isinugod sa ospital para sa agarang medikasyon.
Batay sa paunang imbestigasyon, sakay ang mga sundalo sa isang asul na sasakyan patungo sa isang liblib na lugar sa Munai para sa isang humanitarian at peace-building mission nang mangyari ang pananambang.
Agad na ipinadala ang 44th Infantry Battalion upang tiyakin ang seguridad ng lugar at habulin ang mga responsable. Patuloy ang joint military at police operations at clearing operations upang maprotektahan ang mga kalapit na komunidad at maiwasan ang karagdagang pinsala.
Inilarawan ng WESMINCOM ang pag-atake na walang puso, mapanlinlang, at karumal-dumal na gawain para sa mga mga sundalong nagsisilbi sa komunidad at nagtataguyod ng kapayapaan. Ito rin umano ay isang malinaw na paglabag sa karapatang mabuhay at kapakanan ng mga sibilyan.
Kasabay nito, ipinapaabot ng AFP ang taos-pusong pakikiramay sa mga pamilya ng mga nasawing sundalo.
Ang kanilang sakripisyo para sa kapayapaan at sa sambayanang Pilipino ay mananatiling pinararangalan.
