Mas nagdamo pa ang nagbisita Quezon City Jail Male Dormitory kun sa diin nakapriso ang anay Senador nga si Ramon “Bong” Revilla Jr., sa ikatlo nga adlaw bangud sa flood control scandal.
Lakip sa mga nagbisita amo ang iya asawa nga si Lani Mercado kag bata nga si Gianna, samtang may pila man nga nagdala sang pagkaon, nga ginpasugtan sang Bureau of Jail Management and Penology ukon BJMP.
Ginpagwa sang Department of the Interior and Local Goverment (DILG) kag Philippine National Police (PNP) ang mga mug shot ni Revilla kag sang anum pa nga iba nga akusado sang kaso.
Suno kay Interior Secretary Jonvic Remulla, isa lang ka regular inmate si Revilla, kag temporaryo nga yara sa individual cell bangud sa seven-day quarantine para sa bag-o nga inmates.
Ginpasiguro man ang istrikto nga seguridad sa palibot sang QC Jail.
Ginmando sang Sandiganbayan ang pagkapriso ni Revilla matapos siya kasuhan sang malversation sang ₱92.8-milyon nga ghost flood control project sa Pandi, Bulacan.
