KORONADAL CITY – Nagapadayon ang imbestigasyon sang kapulisan angot sa nasapwan nga patay nga lawas sang isa ka 15-ayos nga babaye sa kapinyahan sa Barangay Maligo, Polomolok, South Cotabato subong nga adlaw sang Huwebes, Enero 15, 2026.
Ginkilala ang biktima sa kay alyas Shane, 15 anyos kag residente sang Purok 5 DAM, Barangay Landan, Polomolok, South Cotabato.
Base sa inisyal nga imbestigasyon, isa ka tawo ang nakakita sa lugar kung sa diin nakit-an niya ang nagahapa nga lawas sang nasambit nga biktima samtang siya ang nagapanghilamon.
Gilayon niya ini ginpahibalo sa iya mga upod kag sa mga opisyal tubtob nga nagtawag sila sang mga pulis.
Samtang, gilayon man nga nagresponde ang mga personnel sang Polomolok MPS kag ang SOCO sa crime scene agod magpatigayon sang imbestigasyon sa lugar.
Sa dugang pa nga imbestigasyon, ginpahayag sang mga otoridad nga may indikasyon nga posible ginhimuslan ang biktima bangud wala na ini sang bayo, apang ini ang mahimo pa lamang makumpirma paagi sa medico-legal nga proseso.
Sa subong, igapaidalom sa postmortem ang patay nga lawas sang biktima agud mapamatud-an kung ini gid ang gin himuslan.
Ginalantaw man subong sang kapulisan kun sin-o ang mga ulihi nga nakaupod sang biktima kag kun paano ini nakaabot sa nasambit nga lugar.
