KORONADAL CITY – Yara na sa kustodiya sang mga otoridad ang duha ka mga drug suspek nga ginakabig High Value Individuals (HVI) matapos maaresto sa ginpatigayon nga drug buy-bust operation sa Purok Pagkakaisa, Barangay San Felipe, Tantangan, South Cotabato,alas-4:33 Biyernes sang hapon, Disyembre 5.
Ginkilala ni PMaj Romeo Albano Jr., hepe ng Tantangan Municipal Police Station, ang mga nadakpan nga sanday Regie Somogod, 32-anyos, walang trabaho, residente sang Purok Riverside, Brgy. Sto. Niño; kag Paul Robert Bechayda, 42-anyos, construction worker, residente sang Purok Suscano, Brgy. Morales, Koronadal City.
Nadakpan ang mga ini matapos maaktuhan nga nagabaligya sang sachet sang shabu sa isa ka operatiba nga pulis nga nagserbe nga poseur buyer.
Narekober sa aktuwal nga transaksyon ang mga sachet sang ginapatihan nga shabu nga may kabug-aton nga 0.20 gramo nga nagakantidad sang P1,360.
Matapos sini, nakumpiska pa sa suspek nga si Bechayda ang isa ka sachet sang shabu nga ginabulubanta may kabug-aton ngna 50 gramo, samtang narekober man kay Somogod ang isa ka clutch bag nga may pito pa (7) ka sachet sang shabu nga may kabug-usan nga 350 gramo nga kabug-aton.
Sa kabug-usan, yara sa 400 gramo ang nakumpiskar nga ilegal nga droga gikan sa mga suspek nga ginabulubanta may kantidad nga P2,720,000.
Natalana nga pasakaan sang kaso nga paglapas sa Section 5 kag 11, Article II sang RA 9165 ukon Comprehensive Dangerous Drugs ang mga suspek.
Padayon naman ang panawagan sang mga otoridad sa mga katawhan nga luntatan na ang pagbaligya sang illegal nga droga agud makalikaw man sa kaso.
