Ginpahayag ni Presidente Ferdinand R. Marcos Jr. nga ang pondo halin sa mga gin kanselar nga proyekto para sa flood control sa tuig 2026 pagagamiton liwat kag igare-align sa mga prayoridad nga sektor pareho sang edukasyon, ikaayon lawas, agrikultura, panimalay, imprastruktura, ICT, pagpanarbaho, serbisyo sosyal, kag enerhiya, upod ang paghatag sang klaro nga “menu” sang paggagamitan bilang giya sa mga mamalidha.
Dugang pa niya, ini ang pinakauna nga tikang pakadtu sa mas klaro nga transparency kag accountability, kasunod sang mga isyu sang iregularidad sa paggamit sang pondo sa mga proyekto sang imprastruktura nga naguwa sa mga nagligad nga inadlaw.
Bisan pa nga wala sang bag-o nga pondo nga igahatag para sa mga flood control projects sa national budget sang 2026, ginpaathag ni Presidente Marcos nga ang PhP350 bilyon nga na-allocate para sa 2025 kinahanglan anay magamit sang husto antes pa magsugod sang bag-o nga mga tikang.
Ang pagkanselar sang mga flood control projects kag ang pagplano sang prayoridad nga spending plan kabahin sang tikang sang Presidente sa pagpatukod sang Independent Commission for Infrastructure (ICI) nga magatutok sa mga anomalya sa mga flood control projects sa sulod sang napulo ka tuig nga naglabay.
