Nakumpiskar sang Koronadal City Police Station sa ginlunsar nga operasyon ang masobra P100,000 nga balor sang smuggled nga sigarilyo sa Purok Paghili-Usa, Barangay Topland, Siyudad sang Koronadal.
Ini ang nangin pahayag ni Police Captain Ralph Marvin Francis Rivera, spokesperson sang Koronadal City PNP, sa interview sang Bombo Radyo Koronadal.
Suno kay Rivera, kabahin ini sang padayon nga monitoring kag kampanya kontra krimen sang kapulisan, partikular batok sa pagpamaligya sang mga kontrabando ukon smuggled goods.
Ginaresto sang mga otoridad ang isa ka babayi nga ginpakilala sa alyas “May,” isa ka businesswoman kag residente sang amo man nga lugar, matapos napatud-an nga nagabaligya siya sang smuggled nga sigarilyo.
Wala siya nakapakita sang mga legal nga dokumento nga nagapamatuod nga authorized dealer siya sang nasambit nga mga produkto, rason nga ginaresto siya sang kapulisan.
Nakumpiskar sa operasyon ang 100 reams sang Berlin cigarettes kag 100 reams sang Canon Menthol cigarettes nga may kabug-osan nga market value nga P120,000.
Gilayon naman nga ginturn-over sang kapulisang ang mga nakumpiskar nga mga smuggled nga sigarilyo sa bureau of customs kag sa karon, yara na sa kustodiya sang Koronadal City Police Station ang nasambit nga suspek kag maga-atubang sa nagakaangay nga kaso batok sa iya.
