Madamo nga mga basketbolista na ang nagsumiter sang ila nga interes na maghampang sa Gilas Pilipinas nga magapartisipar sa Southeast Asian Games.
Suno sa Samahang Basketbol ng Pilipinas (SBP), ila ginbaton ang mga kopya sang pasaporte sang pila ka mga manugbasketbol nga magahampang sa SEA Games nga pagahiwaton sa Thailand sa Disyembre.
Ginsumiter ang pila ka mga kinahanglanon kay Coach Norman Black nga amo ang magapanguna sa Gilas para sa SEA Games.
Pila sa mga ini amo sanday Kevin Quiambao, SJ Belangel, Quentin Millora-Brown, Matthew Wright kag Ray Parks.
Upod man nga nagpahayag sang interes sanday US NCAA player Remy Martin, Boogie Ellis, kag Kihei Clark, UAAP stars, sanday Mike Phillips kag Mason Amos, kag sanday Juan kag Javi Gomez de Liaño kag Jason Brickman.
Ginsiling ni Black nga mahibal-an pa ang pinal nga listahan sang mga magahampang samtang nagapalapit na ang umpisa sang kompetisyon halin Disyembre 9 tubtob 20.
