Opisyal nga magapasaka sang kaso subong nga adlaw ang whistleblower nga si Julie Patidongan alyas “Totoy” sa National Police Commission (Napolcom) batok sa 15 ka mga pulis nga ginatudlo nga may kahilbtan sa pagkadula sang mga sabungero.
Suno kay Napolcom Vice Chairman Rafael Calinisan, pangalanan ni Patidongan ang 15 ka mga pulis sa iya ipasa nga affidavit, nga daku nga bulig agud masugod na ang imbestigasyon sa ila pagkaimbolbar sa kontrobersyal nga kaso.
Bisan pa nga administratibo lang anay ang kaso nga atubangon sang mga pulis, posible man sila nga kasuhan sang kriminal depende sa mga ebidensya.
Ginapaabot nga matapos ang imbestigasyon sulod sang duha ka bulan.
Suno kay Calinisan, mabug-at ang akusasyon ni Patidongan kag ginadalahig pa ang mga mataas nga opisyal sang PNP.
Ginklaro ni Calinisan nga ila lang administrative jurisdiction amo ang para sa mga aktibo nga pulis.
Wala na sila sang otoridad sa mga retirado na nga pulis nga nalakip sa kaso sang pagkadula sang mga sabungero.
Kun mapamatud-an nga may sala sa grave misconduct, posible nga masuspinde ukon madisbar ang mga pulis.
Ginsiguro man ni Calinisan nga sundon gid ang proseso sang hustisya para sa tanan nga apektado.
