Malipayon nga ginpangunahan ni South Cotabato Governor Reynaldo S. Tamayo Jr. ang opening program sang Tnalak Festival sa diin gintambungan kag ginsaksihan man sang nagkalain nga mga opisyal sang 10 ka munisipyo kag isa ka syudad nga naga komposar sang South Cotabato lakip man sa mga nagtambong ang mga nagkalain-lain nga personalidad, private sectors kag mga tribu kag mga bisita sa nagkalain-lain nga kaiping nga mga kalugaran.
Nangin sentro sang mensahe sang gobernador ang paghili-usa sang mga tribu sa probinsiya sa diin ginpahayag sini nga halos 20 na ka mga tribu ang ara sa kasamtangan sa probinsiya kag naga pangabuhi sang malinong kag matawhay.
Ginpasalamatan man sang opisyal ang mga indigenous people kag mga tribu nga muslim settlers nga mainit nga nagbaton sa mga ninuno sang iban pa nga mga tribu sa probinsiya nga wala sang pag duha duha.
Ginpahayag man sini nga ang paghiliusa sang mga ninuno sang tanan nga tribu sang una, amu ang nangin mapag-on nga salandigan sang malinong kag manami nga harmoniya sang paghili-usa kag amu man ang simbolo sang pagselebrar sang Tnalak Festival.
Sa kabug-usan nangin maginalag-on kag nangin malinong ang opening ceremony sang 26th T’nalak Festival and 59th Founding Anniversary sang probinsiya sang South Cotabato
